無聊文字: 我的人生經已完結

2007/09/10

我的人生經已完結

人愈大就愈會改變係事實，但係我發現我既人生愈嚟愈變得有點……

試試以吃喝玩樂為主題。

以前一直都唔係幾捨得食，不過而家反而有點改變。

「南蠻亭」，「伊呂波」又或者澳門既「咖哩屋」，總之好味道就能成為心頭好，甚至幾十蚊一個漢堡包，全部一試無妨。

其實纏繞多年既問題係，點解同一樣既米，喺唔同地方，價錢可以係天壤之別？我唔明。

以前一日到黑愛浦機舖，但係呢幾年已經冇咩好玩，亦冇新意，而家大部份時間都只放在屋企部Xbox360上，打得最多既，竟然係以前掂都唔掂既rainbow6。

而家連街都少出，雖則睇戲食飯一樣唔會變。但係去玩，去顛，情願慳啲洗留返一炮過到日本玩新款既推幣機。

商場，全香港都一式一樣，一個悶字！想買咩都好，其實事但去一個都搞掂。

shopping，咪啦！潮流早就追唔上，時常留意的，反而是惠康的西瓜，不管十六蚊一個，還是個半一磅，一樣多汁兼有沙。

酒吧早兩年開始就提唔起興趣再去，情願到酒窖買枝智利的SANTA RITA 120 SAUV BLANC白酒，又或者同樣係智利的Colores del sol CHARDONNAY，甚至顛到揸車去city super將一箱箱既strongbow抬返屋企飲好過。

原因不外乎幾個，一來貴，二來我已經冇咁多水吹，三來我冇送醉貓返屋企既習慣，重有，我唔會有興趣請個自己唔識既人飲我用錢買返嚟既酒。

其實香港既酒吧呢幾年轉咗型，大部份都係以美女陪猜陪飲為主。

妖～老實講，要傾計，要飲酒寧願去清吧好過，因為實在好撚煩囉！大家又唔識，又唔熟，想猜枚解悶，洗乜搵個吹到我一面煙既bar妹囉。

何況，最鍾意飲既Hoegaarden同strongbow，喺MK根本搵唔到，

我諗如果我玩嘢啲，用中文名去問啲酒吧啲人，
　　「唔知呢度有冇得飲福街白啤酒（Hoegaarden）或者戰士蘋果酒（strongbow）？」

分分鐘一係以為我喺嚟踩場，唔係既話，實有九成會俾人當係自由行。

運動方面，早在一百戒條說過，同其他男人有汗水接觸的運動全都不會碰。

籃球？跟朋友在Xbox360網上打幾場算唔算？

保齡球好有興趣，不過太高消費，玩不起。

桌球偶然都會打，但要找個同等級的對手實在不易，因為太差。

反而最近有項打得不錯的玩意，一樣過癮得渾身是汗，不是做愛，而是高球。

用上大量的理據去支持自己的行為，表面上看似精明，其實內含不少撿便宜的消費模式，那就足以證明，我的人生已經完結。